No Parking

Masunurin naman talaga ang mga Pinoy. Hindi lang talaga tayo marunong sumunod. Kuha mo?

Bawal Umihi Dito

Bawal Magtapon ng Basura Dito

Bawal Magsakay at Magbaba Dito

No Parking

No Loading and Unloading Zone

Whhoohh! Naliligo sa "Bawal" at "No". Yan ang batas sa Pinas. Simple. Pero ang pagtupad sa mga 'yan ng walang palya? Tsk. Tsk. Imposible.

Bakit nga ba matigas ang ulo ng mga Pinoy? Ang lahat ng "bawal", ginagawang "pwede". Lahat ng "No", ginagawang "Yes." Siguro perfect natin ang quiz kung ang subject e tungol sa Figure of Speech na Irony. Sabi ng iba, "kaya hindi umuunlad ang bansa eh, mga Pilipino kasi!" Tignan mo na lang 'tong nakuhaan ko ng picture sa isang street sa Maynila. (Sensya na sa kuha ko, hindi ko talaga alam ang photography.)

Kitang kita naman talaga ang pagkamasunurin ng Pinoy.Kitang kita mo talaga na number one na maipagmamalaki natin ay ang pagkakaroon natin ng disiplina. Kitang-kita na marunong tayo sumunod sa batas. Kitang-kita. Kita mo?

Sa tuwing makakakita ka ng mga ganyang eksena sa paligid mo, wala ka talagang ibang magagawa kundi mapabuntong hininga na lang sabay sabi sa sarili mo, "Hay. Mga Pilipino talaga! Tsk. Tsk." Tapos aagos sa ugat mo yung kahihiyang binibigay sa dugo mo ng mga kapwa mo Pinoy. Maraming ayaw maging Pinoy, ang hindi nila alam, Pilipinas na mismo ang umaayaw sa kanila.

Ipokrita naman ako kung sasabihin kong naging masunurin ako sa araw-araw na buhay na pinagkakaloob Niya sa'kin (na pinagpapasalamat ko dahil hindi Siya nagsasawa). Maraming beses na din akong sumakay ng bus sa "Walang Sakayan, Babaan Lamang". Ginagawa ko 'yun kapag talagang wala na kong pag-asang makauwi kung maghihintay ako doon sa tamang sakayan. Tapos sasabihan ko ang sarili ko ng pampalubag loob para sa nadamay kong konsensya, "Ok lang yan Eych, MINSAN lang naman eh.". Pero naiisip ko din, siguro lahat ng Pinoy e may psychic ability o kaya kamag-anak nila sina B1 at B2 ng Bananas and Pajamas. "Pinoy, naiisip mo ba ang naiisip ko? Sakay na lang tayo dito, MINSAN LANG NAMAN EH!"

Pinoy ka. Alam mong hindi pwede maging "pwede" ang isang "bawal."

Posted in: Blog ni Eych,Mga Bawal